كلمة رئيس مصلحة القطاع العام

في 03\07\2010

مسا الخير واهلا فيكن بالعشا التالت للقطاع العام

هاللقاء ومن بعد تلات سنين كلنا ضحينا اشتغلنا تعبنا فيين لنحقق اهدافنا الي كل سنة منرجع نأكد عليها والي هي اعادة التوازن بالادارت وتوجيه الشباب المسيحي تيفوت عالدولة.

يا رفاق بعد الجفا الي صار بين القوات اللبنانية وسلطة الوصاية، وبعد الاضطهاد يللي عانينا منو بهالفترة، وبعد الانحصار الكبير والواضح للوجود المسيحي بادارات الدولة رجعنا. رجعنا نقول انو نحنا هون، نحنا بدنا حقوقنا، حقوقنا يلي اخدتوها منا بعهد الوصاية. رجعنا نقول نحنا بدنا المناصفة، بدنا التوازن، بدنا نفوت عالدولة، بدنا نكون شريك متساوي ، بدنا نشارك ببناء هالدولة تترجع دولة القانون والمؤسسات، دولة الامان والازدهار، دولة العيش المشترك يللي رح نبنيها سوا مسحيين ومسلمين.

اليوم هالورشة يللي بلشناها كلنا سوى، منعرف اديش عم تاخد جهد، منعرف اديش عم تاخد تعب بوضع منو هين، وضع الدولة انتو اكتر منا بتعرفوه، من تدخلات ان كان على صعيد سياسي او حزبي او طائفي بتأثر كتير على شغلنا، منشان هيك بتشوفو انو التقدم بالقطاع العام هو تقدم ثابت، عارفين وين بدنا نروح بس تقدمنا صعب ومنو هين. بس كلنا صابرين، كلنا مكملين، كلنا عنا ايمان بقضيتنا، كلنا حلمنا واحد ورح نحققو سوا.

بعد الجولات يللي قمنا فيها عللمناطق بلشنا نلاقي تجاوب ولو انو بشكل خجول، بس صارو شبابنا عم يعرفوا بوظيفة الدولة يفكروا فيا ويقدموا عليا وهيدي هي الخطوة الاولى على طريق طويل رسمنا وماشيين عليه.

يا رفاق بعد تلات سنين فيي قول انو تعبنا بلشت تبين نتايجو، صرنا على تواصل مع كل ادارات الدولة، صارت لجانا موزعة بأغلبية الوزارات والادارات العامة، عم نتقدم شوي شوي مظبوط، بس صوتنا صار مسموع وينحسبلوا حساب، صار ممنوع تصير اي تشكيلات او تعيينات من دون ما يكون النا رأي فيها وراضيين عليها، من الاعلام للمالية للعدل للجمارك وغيرن وغيرن ، يمكن يلي عملنا مش على قدر طموحاتنا، في مطارح خاب املنا فيا بس في مطارح حققنا مطالبنا وكانت حصتنا الحصة الكبيرة.

نحنا يا اخوان هدفنا واضح، عارفين شو بدنا ويين نوصل، وكل هالشي رح نعملوا سوا ونفرح بنتايجو سوا لانو نحنا فريق ناجح مش بس بالانجازات الكبيرة او الزغيرة يلي حققناها، نحنا فريق ناجح لانو بعدو متماسك بالرغم من كل المصاعب يللي عم يعيشا. بشكركن، بشكر حضوركن، بتمنى انو كلنا نبقى سوا، بتمنى انو سنة ورا سنة ما ينقص ولا وج من الوجوه الموجودة معنا بالعكس يزيد ناس، يزيد شباب، يزيد شباب مأمنين بقضيتا.

هيدا كلنا الي بدنا ياي، نكبر ونكبر ونكبر لمصلحة لبنان، لمصلحة المسيحيين، لمصلحتنا كلنا.

الله يقويكن، وعقبال كل سنة