كلمة رئيس مصلحة القطاع العام

في 22\5\2009

 برحب فيكن بالعشا التاني لمصلحة القطاع العام ، اللي بسائب قبل جمعتين من الانتخابات النيابية ،رح احكي عن شقين :  الاول بيتعلق بمصلحة القطاع العام ، والشق التاني بيتعلق بالانتخابات النيابية لانو كل حزب عندو هدف الوصول للسلطة السياسية يللي من خلالها بيحقق اهدافو وتيقدر يوصل بيجيش كل امكانياتو وكل قواعدو ومناصرينو بالانتخابات النيابية بشكل خاص. من هل المنطلق رح احكي عن القطاع العام ودورو ودورنا بالانتخابات النيابية .

القطاع العام يا رفاق  متل ما بتعرفو بلشنا فيه من سنتين ، بلش طفل صغير ،واليوم هالطفل كبر وصار قادر يحكي ، صار يسمع صوتو للكل ، صار قادر يمشي ويتحرك بين كل قطاعات الدولة وصار يزعج . يزعج كل اللي كانو مرتاحين وفاضيتلهن الساحة ، اجاهن ولد مشاغب يرجع الحق وينصف المظلوم ويساعد كل مين بيستحق انو يوصل . هالشي قدرنا وصلنالو بمشاركتكن كلكن . هالشي هوي نتيجة تعب كتير من الرفاق اللي عم يقدموا : المجهود ، والوقت ويعطوا الافكار ،يدرسوها ، يطوروها لنقدر نكبر بالمصلحة اللي بتكبر فيكن .

بتكبر بكل واحد امن انو نحنا لازم نكون موجودين بالدولة ، وانو ممنوع يكون في ميزانين نوزن فيهن الموظفين .

انا بقلكن وبأكدلكن انو هيدا الزمن راح ورح يرجع زمن الميزان الواحد ، ميزان الكفوء والشريف ، ميزان النضيف ،مش ميزان المحسوبيات والوسايط . هيدي هي الدولة لي نحنا مراهنين عليا تاتحمي ولادنا بالمستقبل سياسيا وتأمن استمرارية اقتصادية للجيل الطالع وما يحملوا ولادنا بالمستقبل اللي حملنا نحنا بالماضي .

المصلحة يا رفاق بلشت وكان عددنا عا قد عدد الاصابع هلأ بقوتكن ومشاركتكن عيلتنا كبرت كتير وهالعيلة الغنية بافرادا وبالناس اللي بتعطي من كل قلبا وتحط من وقتا ومن جهدا تتنجح القطاع وتفرجي للعالم صورة القوات اللبنانية الحقيقية ، صورة بتناقض كل الصور اللي جربو يخلقوها عنا وانو نحنا منملك مشروع بعيد عن الدولة وانو مشروعنا مش مشروع الدولة نحنا بدنا نجي ومن خلال القطاع العام وعبركن ومن خلال كل موظف شريف ونضيف نفرجي صورة القوات اللبنانية الحقيقية لانو هالدولة ما رح تقوم الا بناس كفوئين ونخنا كقوات لبنانية بدنا نفوت عالدولة ونفوت ناس كفؤين نضاف ، كفهن ابيض مش ناس فاسدين  وما عندن شي الا الواسطة . ما بدنا نفوت ناس كيف ما كان بس كرمال يكون عنا حصة لانو هالدولة لازم نعطيها خيرة شبابنا لانو هيي اللي بدا تأمنلنا المستقبل لولادنا ،ما فينا نحكي عن فساد الغير بالادارة ونعمل متلن . ومتل ما سبق وقلت ميزان الكفاءة هوي ميزاننا ومكيال النضافة هو مكيالنا .

المصلحة يا رفاق كبرت وغطت اغلبية وزارات الدولة من المالية ، الاتصالات ، البيئة ، العدل ، الصحة ، الطاقة ، التنظيم المدني ،التنمية الادارية ،التربية ،الاشغال ،الخارجية ، العمل ، الاقتصاد ،السياحة ،الشؤون الاجتماعية ،المهجرين ،الاعلام ،الصناعة ، الزراعة ،تعاونية الموظفين ،المركز التربوي ،   ومشروعنا اكبر من هيك انو نغطي كل لبنان بكل وزاراتو وقطاعاتو وما يضل في موظف واحد ما يسمع فينا . في عنا شغل كتير والمشروع راكب عالسكة مطلوب منكن كلكن تشاركو لانو نحنا عيلة وكل فرد منا مطلوب منو يشاركنا بافكارو لانو المشاركة هي غنى كرمال هيك شاركونا بافكاركن ، وبمشاريعكن واهدافكن تا سوا نحط استراتيجية واضحة توصلنا للدولة اللي منطمحلا .

الشق التاني اللي بدي احكي في عن الانتخابات هالشق بيعنينا متل ما بيعني كل القطاعات التاني ولازم كلنا نشارك بفعالية بمناطقنا بكل لبنان وندعم اللوايح اللي شاركت بتأليفا ودعمتا القوات اللبنانية وقوى 14 اذار. ممنوع التساهل ، ممنوع نقول هالشي ما بيعنينا لازم نكون كلنا مكنة انتخابية لانو عم نصوت لافكارنا ومعتقداتنا ،  وخط سياسي واضح ونضيف ودولة امن وسلام وقانون منطمح لاالها . بهالانتخابات عم نصوت لمستقبل ولادنا وكرمال صورة وطن منشوفا شارقة ومزدهرة وطن منعيش في مع كل الطوايف ومنتشارك حلاوة ايامو مع كل اهلو .

هاي الصورة اللي رح بتكون اذا ربحنا الانتخابات بس اذا خسرناها الصورة رح بتكون عكسا تماما صورة سودا مظلمة ، من هون لازم نشارك ونساعد وننتخب متل ما لازم ، ممنوع نكون عالهامش العملية هي عملية متكاملة اساسا هو الالتزام اللي منثبتو بالتطبيق.

 متل ما بيقولو عنا بالكنيسة مش مهم تكون مسيحي مؤمن المهم تمارس ايمانك، نحنا عنا ايمان سياسي كبير بلبنان، وبالوجود المسيحي الحر، خلينا نترجمو نهار الانتخابات لننجح مرشحي ولوايح القوات اللبنانية و14 اذار ، ما بدي طول عليكن، الله يوفقنا ونقدر نكمل المسيرة، مسيرة القطاع العام تحسينو وتطويرو والمشاركة الفاعلة في، ومسيرتنا السياسية اللي منثبتا و منقويا بالانتخابات اللي جايي .

عشتم ، عاشت القوات اللبنانية ، عاش لبنان